يوميات المواطن السوري الفقير (محجوب)*

( الحلقة 6 )

بعد تناول الشاي وممارسة الأركيلة خرج الصديقان من القهوة وراح كل واحد منهما في طريقه..
بعد أيام، ويوم الجمعة تحديداً والذي جرت فيه التفجيرات الارهابية التي استهدفت قلب دمشق وقضى شهداء بسببها.
محجوب يمشي في شوارع دمشق، الحزن مرسوم في كل متر، الدموع تمتزج بالدماء في بسمات الأمل على وجوه السوريين.
... متعب أيضاً يتجول في أزقة أعتق المدن، منحني الرأس، يدخن السجائر، لكنه يبتسم فجأة بلقاء أبو الحلول والتفاؤل "محجوب"
- محجوب : كيفك يا متعب
- متعب : أهلين محجوب.. ليش هيك مكشر؟
- محجوب : لأنو صرنا أرقام يا صاحبي، تخيل حالك أنت ماشي بالطريق يجي واحد يناديلك تعا يا ستمية وخمسة وسبعين، بما أنك مشروع رقم لشخص ميت، بغض النظر أنت معانا ولا مع التانين ومين التانين ومين المعانا؟؟!!
- متعب: والله معك حق
- محجوب: لك كل يوم دم كل يوم دم، واللي عم يموت هو الشعب (لا النظام ولا المعارضة) الشعب وبس.. هوي الضحية.
- متعب: والله مو رايحة غير علينا.. شو رأيك بهالانفجارين الي صاروا؟
- محجوب: بتعرف.. كنت بتمنى هالشي يلي صار يخلينا نصحى، يخلينا نبطل نفكر بفكرة الأولانيين والتانيين، وفكرة يا معنا يا ضدنا، وقصة المعارضة والموالاة.
- متعب: بس والله عمل اجرامي كان.. والله يرحم كل شهداء سورية، بس مين برأيك المجرم؟
- محجوب: رح أعطيك من الأخير.. طلع تحليل سريع كتير!! خلال عشر دقايق كان يلي عم يحلل مكتشف أنو يلي ورا هالانفجارات هو تنظيم القاعدة.. وعم يعملو فحص دي ان اي!!!!!!!!!!!!!!!!!!!!!!!!!!!!!!!!!!!!!!!
- متعب : تنظيم القاعدة هاد متل تنظيم كفرسوسة؟!
- محجوب (بابتسامة مُغتَصبة): المهم تباً للارهاب مين ما كان وراه، ولك ااااااااااااااااخ يا شهيد دمك غالي، مو مهم يا شهيد اتجاهك السياسي، بيكفي أنك شَرّبت الوطن من دمك، ولك ااااااااااااااااااخ يا وطن شو عم توجعني أديش في عالم لازم تموت لتعيش أنت.. بيرخصلك يا وطن.. بيرخصلك يا وطن

يتبع ...

* تنشر بالتعاون مع مجلة "المخرز" على الفيس بوك.